xoves, 31 de xullo de 2014

Esquerda Unida levará varias iniciativas ao Pleno do mes de xullo



Hoxe temos unha nova sesión plenaria no Concello do Grove.

O goberno local levará á aprobación unha solicitude de crédito de 400.000 €:
 - Dese total, non mostraremos o noso apoio aos 250.000 € destinados ao Centro de Interpretación de Carpintería de Ribeira (CICRI), o que ven sendo unha salón de actos que o tripartito nos quere vender como un Auditorio, e para o cal non existe un financiamento total da obra, polo que non admitiremos que o Concello aumente o seu endebedamento sen unha garantía de que a obra conta con investimento total. Así mesmo consideramos que a súa situación non é a máis idónea xa que se continúa saturando a fachada marítima do casco urbano do Grove, en concreto, a zona do Corgo pretendendo situar esta infraestrutura en solo portuario estragar un excelente escaparate do noso pobo cara os visitantes e unha zona de espallamento dos nosos veciños tanto nas festas como nos mercados semanais. Ademais, temos que ter en conta que se está a redactar o plan xeral de ordenación municipal no cal xa se debería ter prevista a planificación desta infraestrutura nunha situación máis idónea, como podería ser a Avenida Irmáns Otero Goday. Tamén queremos sinalar que no pasado, Esquerda Unida nos opuxemos contundentemente á situación da EDAR na mesma zona por motivos similares.

- En canto aos outros 150.000 € destinados ao ximnasio, o noso concelleiro Xam Lamelas dará o seu voto a favor, a pesar de non estar de acordo co modelo que o tripartito ten disposto para a súa xestión, xa que neste caso a obra si conta cun financiamento total, a deputación abonará máis do 60%.

Outra das mocións que o goberno levará a pleno será a nova “Ordenanza municipal reguladora dos procedementos para a intervención e control na execución de obras, implantación de instalacións e actividades ou Servizos” na que optaremos pola abstención, non sen antes criticar a falta de consenso coa oposición para a redacción da mesma.

Pola nosa parte, Xam Lamelas tentará incluír por urxencia dúas mocións; a primeira en defensa do Pobo Palestino e de condena á agresión bélica de Israel; e a outra da Agrupación Comarcal de Pensionistas e Xubilados de CCOO en contra da perda de poder adquisitivo das pensións públicas.

Ademais das mocións, dende Esquerda Unida formularemos varias peticións e preguntas ao executivo local.

Solicitaremos que dean cumprimento dunha vez por todas á moción aprobada por unanimidade en abril do 2013, onde solicitábamos a creación dun parque canino e zonas de espallamento en diferentes puntos da localidade.

Tamén preguntaremos sobre o novo aparcadoiro municipal na zona de beiramar. Interésanos saber durante canto tempo se manterá o aluguer desa parcela e cal é a cantidade mensual que o concello ten que abonar. Mostraremos o noso malestar por este despilfarro cando nos últimos meses o tripartito decidiu eliminar unha serie de aparcamentos en diferentes rúas do Grove (Rúa da Praza, Rúa Candido Acuña, Zonas do Corgo, Rúa Villavella...).

Denunciaremos a situación dos semáforos e os radares que o Concello instalou en diferentes rúas do Grove, xa que non se utilizan para regular o trafico e si para sangrar máis os petos dos nosos veciños. No caso dos radares en Porto Meloxo e na Rúa do Conde, están instalados en dirección as empresas alí situadas co obxectivo de gravar aos traballadores na súa quenda de entrada. En canto aos semáforos-radar, tamén están instalados para “pillar” aos condutores que saen da vila, cando si realmente estiveran para mellorar a seguridade viaria, controlarían o tráfico de entrada.

Tamén nos interesaremos pola promoción turística, a programación cultural e o estado de distintas rúas do Grove.

Ningún comentario:

Publicar un comentario